SN 56.11

From WiPitaka
Jump to: navigation, search
This page contains changes which are not marked for translation.

PTS: SN V/420,25-424,11

Dhammacakkappavattanasutta

Evam me sutaṃ ekaṃ samayam Bhagavā Bārāṇasiyaṃ viharati Isipatane Migadāye. Tatra kho Bhagavā pañcavaggiye bhikkhū āmantesi. Dve me bhikkhave antā pabbajitena na sevittabbā. Katame dve. Yo cāyaṃ kāmesu kāmesu khallikānuyogo hīno gammo puthujjanīko1 anariyo anatthasaṃhito. yo cāyam attakilamathānuyogo dukkho anariyo anatthasaṃhito. Ete te bhikkhave ubho ante anupakamma majjhimā paṭipadā Tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati.

Katamā ca sā bhikkhave majjhimā paṭipadā Tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati. Ayam eva ariyo aṭṭhaṅgiko maggo. seyyathīdaṃ. sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayam kho sā bhikkhave majjhimā paṭipadā Tathāgatena abhisambuddhā cakkhu- ñaṇa- karaṇī upasamāya abhiññāya sambodhāya nibbānāya saṃvattati.

Idaṃ kho pana bhikkhave dukkham ariyasaccaṃ. Jāti pi dukkhā jarā pi dukkhā vyādhi pi dukkhā maraṇam pi dukkhaṃ sokaparidevadukkhadomanassupāyāsā pi dukkhā. appiyehi sampayogo dukkho piyehi vippayogo dukkho. yam picchaṃ na labhati tam pi dukkhaṃ. saṃkhittena pañcupādānakkhandhā pi dukkhā. Idam kho pana bhikkhave dukkhasamudayam ariyasaccaṃ. Yāyaṃ taṇhā ponobbhavikā nandī rāgasahagatā tatra tatrābhinandinī. seyyathīdaṃ. Kāmataṇhā bhavataṇhā vibhavataṇhā.

Idaṃ kho pana bhikkhave dukkhanirodham ariyasaccaṃ. Yo tassā yeva taṇhāya asesavirāganirodho cāgo paṭinissaggo mutti anālayo. Idaṃ kho pana bhikkhave dukkhanirodhagāminī paṭipadā ariyasaccam. Ayam eva ariyo aṭṭhaṅgiko maggo. seyyathīdaṃ. sammādiṭṭhi. la-pe. sammāsamādhi. Idaṃ dukkham ariyasaccan ti me bhikkhave pubbe ananussutesu dhammesu cakkhum udapādi ñāṇam udapādi paññā udapādi vijjā udapādi āloko udapādi. Taṃ kho panidaṃ dukkham ariyasaccam pariññeyyan ti me bhikkhave pubbe. la. pariññātan ti me bhikkhave pubbe ananussutesu dhammesu cakkhum udapādi. pe. āloko udapādi.

Idaṃ dukkhasamudayaṃ ariyasaccan ti me bhikkhave pubbe ananussutesu dhammesu cakkhum udapādi ñāṇam udapādi paññā udapādi vijjā udapādi āloko udapādi. Taṃ kho panidaṃ dukkhasamudayam ariyasaccam pahātabban ti me bhikkhave pubbe. la-pe. pahīnan ti me bhikkhave pubbe ananussutesu dhammesu cakkhum udapādi. pe. āloko udapādi. Idaṃ dukkhanirodham ariyasaccan ti me bhikkhave pubbe ananussutesu dhammesu cakkhum udapādi ñāṇam udapādi paññā udapādi vijjā udapādi āloko udapādi. Taṃ kho panidaṃ dukkhanirodham ariyasaccaṃ sacchikātabban ti me bhikkhave pubbe. la-pe. sacchikatan ti me bhikkhave pubbe ananussutesu dhammesu cakkhum udapādi. pe. āloko udapādi.

Idaṃ dukkhanirodhagāminī paṭipadā ariyasaccan ti me bhikkhave pubbe ananussutesu dhammesu cakkhum udapādi ñāṇam udapādi paññā udapādi vijjā udapādi āloko udapādi. Tam kho panidaṃ dukkhanirodhagāminī paṭipadā ariyasaccam bhāvetabban ti me bhikkhave. pa. bhāvitan ti me bhikkhave pubbe ananussutesu dhammesu cakkhum udapādi ñāṇam udapādi paññā udapādi vijjā udapādi āloko udapādi. Yāva kīvañca me bhikkhave imesu catusu ariyasaccesu evaṃ tiparivaṭṭaṃ dvādasākāraṃ yathābhūtaṃ ñāṇaḍassanaṃ na suvisuddham ahosi. neva tāvāham bhikkhave sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhim abhisambuddho ti paccaññāsiṃ. Yato ca kho me bhikkhave imesu catusu ariyasaccesu evaṃ tiparivaṭṭam dvādasākāraṃ yathābhūtam ñāṇadassanaṃ suvisuddham ahosi. athāham bhikkhave sadevake loke samārake sabrahmake sassamaṇabrāhmaṇiyā pajāya sadevamanussāya anuttaram sammāsambodhim abhisambuddho ti paccaññāsiṃ. ñāṇañca pana me dassanam udapādi Akuppā me cetovimutti ayam antimā jāti natthidāni punabbhavo ti.

Idam avoca Bhagavā. attamanā pañcavaggiyā bhikkhū Bhagavato bhāsitam abhinanduṃ. imasmiṃ ca pana veyyākaraṇasmim bhaññamāne āyasmato Koṇḍaññassa virajaṃ vītamalaṃ dhammacakkhum udapādi. yaṃ kiñci samudayadhammaṃ sabban taṃ nirodhadhamman ti. Evam pavattite ca pana Bhagavatā dhammacakke Bhummā devā saddam anussāvesuṃ. Etam Bhagavatā Bārāṇasiyam Isipatane Migadāye anuttaraṃ dhammacakkam pavattitaṃ appativattiyaṃ samaṇena vā brāhmaṇena vā devena vā Mārena vā Brahmunā vā kenaci vā lokasmin ti. Bhummānaṃ devānaṃ saddaṃ sutvā Cātummahārājikā devā saddam anussāvesuṃ. Etam Bhagavatā Bārāṇasiyam Isipatane Migadāye anuttaraṃ dhammacakkam pavattitam appativattiyaṃ samaṇena vā brāhmaṇena vā devena vā Mārena vā Brahmuṇā vā kenaci vā lokasmin ti.

Cātummahārājikānaṃ devānaṃ saddaṃ sutvā Tāvaṭiṃsā devā Yāmā devā Tusitā devā Nimmānaratī devā Paranimmittavasavattino devā Brahmakāyikā devā saddam anussāvesuṃ. Etam Bhagavatā Bārāṇasiyaṃ Isipatane Migadāye anuttaraṃ dhammacakkam pavattitaṃappativattiyaṃ samaṇena vā brāhmaṇena vā devena vā Mārena vā Brahmunā vā kenaci vā lokasmin ti. Iti ha tena khaṇena tena layena tena muhuttena yāva Brahmalokā saddo abbhuggacchi. ayañ ca dasasahassī lokadhātu saṃkampi sampakampi sampavedhi. appamāṇo ca uḷāro obhāso loke pātur ahosi atikkamma de- vānaṃ devānubhāvan ti.

Atha kho Bhagavā udānam udānesi. Aññāsi vata bho {Koṇḍañño} aññāsi vata bho Koṇḍañño ti. Iti hidam āyasmato Koṇḍaññassa Aññāta-Koṇḍañño tveva nāmam ahosī ti.

Personal tools
Namespaces

Variants
Actions
Navigation
Toolbox